O xurado dos Premios nacionais da cultura galega, tal e como se recolle na súa creación, é un xurado único, formado por 15 persoas e profesionais de recoñecido prestixio e representativas de distintos sectores da cultura nas actividades obxecto dos respectivos premios.

María Xosé Agra Romero: Catedrática de Filosofía Moral e Política da Universidade de Santiago. A súas liñas de investigación diríxense á filosofía política, teorías da xustiza e teoría crítica feministra. É autora de J. Rawls: el sentido de justicia en una sociedad democrática, Corpo de Muller. Discurso. Poder. Cultura (coordinadora), e Ecología y Feminismo, xunto con artigos e capítulos en numerosas publicacións e libros colectivos. É directora da Comisión de Igualdade do Consello da Cultura.

Rosario Álvarez Blanco: Catedrática de Filoloxía Galega na Universidade de Santiago e directora do Instituto da Lingua Galega. Formou parte do equipo do Atlas Lingüístico Galego desde os inicios. É membro da Real Academia Galega, onde ingresou co discurso Variedade e diversidade da lingua. Algunhas reflexións sobre cambio, variación e galego estándar. Publicou diversos traballos de índole lingüística. É coautora da Gramática da lingua galega editada por Galaxia.

Xosé Ramón Barreiro Fernández: Catedrático de Historia Contemporánea de Galicia na Universidade de Santiago e presidente da Real Academia Galega. Foi decano da Facultade de Xeografía e Historia. É autor de obras xurídicas e estudos de historia, como El carlismo gallego, Historia Contemporánea de Galicia, Historia de la imprenta en Galicia e os catro volumes dedicados ós séculos XIX e XX dentro do proxecto editorial Galicia. É membro do Instituto de Estudios Galegos Padre Sarmiento, do Seminario de Estudios Galegos e do Consello da Cultura Galega, entre outros.

Xosé Luis Barreiro Rivas: Profesor e director do Departamento de Ciencias Políticas da Universidade de Santiago. Foi vicepresidente e conselleiro da Presidencia do Goberno Galego e impulsor da TVG. É autor de libros como Ciencia política e ética do poder, Parlamento en el desierto, A terra quere pobo e As inxurias da guerra, e numerosos traballos incluídos en libros colectivos. É analista político de La Voz de Galicia.

María Bouzas: Actriz, presidenta da Academia Galega do Audiovisual. Ten unha extensa traxectoria profesional en teatro, cine e televisión. Cofundou a compañía teatral Compañía de María’. En cine participou, entre outros, nos filmes Urxa, Blanca Madison, O alquimistra impaciente. Abrígate e Unha muller invisible, ademais de varias curtametraxes. En televisión participou en varias series e foi protagonista principal de Terras de Miranda.

Xosé Manuel Buxán Bran: Profesor de Escultura na Facultade de Belas Artes da Universidade de Vigo. Foi comisario de exposicións como Identidades feridas: da arte na doenza, Malas artes e Radicais libres. Experiencias gays e lésbicas na arte peninsular. É autor das compilacións Estudios lesbianos y gays en el estado español e Lecciones de disidencia. Ensayos de crítica homosexual, e coordinador do proxecto Ant_art para o semanario A Nosa Terra.

Domingo Docampo Amoedo: Catedrático do Departamento de Teoría do Sinal e de Comunicacións da Universidade de Vigo. Foi reitor desta universidade e conta cunha longa traxectoria como investigador. É autor do libro Tecnoloxías da Información e as Comunicacións: unha visión desde Galicia, ademais de máis de setenta artigos e comunicacións en revistas, libros e actas de congresos. É membro de Honra da Asociación de Enxeñeiros de Telecomunicación de Galicia e profesor Emérito da Universidad Tecnológica Equinocial de Quito (Ecuador).

María Isabel Fraga Vila: Profesora de Bioloxía Vexetal e directora do Museo de Historia Natural Luis Iglesias da Universidade de Santiago. Doutorouse coa tese Aportación al estudio taxonómico de las especies de los géneros Eric y Calluna presentes en Galicia. Dirixiu diversos estudos e investigacións sobre botánica e escribiu artigos como Efectos das mareas negras en organismos e comunidades vexetais e A riqueza vexetal do Camiño.

Celestino García Braña: Arquitecto, decano do Colexio de Arquitectos de Galicia. É membro da Real Academia Galega das Artes Nosa Señora do Rosario, e profesor de Estética e Teoría da Arquitectura na Universidade da Coruña. Foi finalista do Premio da Arquitectura Española convocado polo Ministerio de Fomento. Entre os seus proxectos máis coñecidos están a recuperación do antiguo edificio do bar Rianxo para sede do Museo Provincial de Pontevedra e a restauración do Mosteiro de Caaveiro.

Ana Romaní Blanco: Escritora e xornalista, directora do programa Diario cultural da Radio Galega. Participou na creación da revista Festa da Palabra Silenciada e na da asociación Mulleres Galegas na Comunicación. É autora das obras poéticas Palabra de mar, Das últimas mareas e Arden, ademais de coordinadora do volume de relatos Narradio. 56 historias no ar. Tomou parte en diversos proxectos artísticos e musicais.

John Rutherford: Profesor do Queen’s College da Universidade de Oxford e presidente da Cátedra de Estudos Galegos desta universidade. Foi fundador da Asociación Internacional de Estudos Galegos. Traduciu ao inglés a varios autores galegos, como Castelao e Méndez Ferrín, e fomentou os estudos sobre a cultura e a literatura galega no Reino Unido. É autor dunha novela en galego, As frechas de ouro.

Felipe Senén López Gómez: Museólogo e xestor cultural da Deputación da Coruña. É presidente e fundador de Amigos dos Museos de Galicia. Impartiu conferencias sobre arte e etnografía e é autor de varias publicacións. Dirixiu o Museo Arqueolóxico da Coruña. É membro numerario da Real Academia Galega de Belas Artes e do Instituto Cornide de Estudios Coruñeses. Pertence ao Instituto Padre Sarmiento de Estudios Galegos e ao Consello da Cultura Galega.

Xurxo Souto: Músico e escritor, director de programas da Radio Galega. Liderou a banda Os Diplomáticos de Monte Alto, que encabezou o movemento coñecido como ‘rock bravú’. Traballou en diversos programas radiofónicos, como A tropa da tralla e Aberto por reformas, e colaborou en varias publicacións. É autor de libros de relatos como A tralla e a arroutada e Tres trebóns ou a novela O retorno dos homes mariños. Na actualidade forma parte do grupo musical Os Tres Trebóns.

 Laura Tato Fontaíña: Profesora da Facultade de Filoloxía e Humanidades da Universidade da Coruña. Os seus estudos céntranse na literatura galega, con especial atención ao teatro, sobre todo ao anterior á Guerra Civil. Ademais de numerosos artigos, é autora de varios ensaios, entre os que destacan Ricardo Carvalho Calero, a dignidade persoal,  Teatro Galego (1915-1931) e Historia do Teatro Galego. Das Orixes a 1936.

 Ramón Villares Paz: Catedrático de Historia Contemporánea da Universidade de Santiago e presidente do Consello da Cultura Galega. Foi decano da Facultade de Xeografía e Historia e reitor da Universidade de Santiago. Foi membro fundador e presidente da Asociación Española de Historia Contemporánea. É autor de máis de setenta publicacións, entre as que que se atopan títulos como Foros, frades e fidalgos, Estudos de historia social de Galicia, Galicia. A Historia, Figuras da nació’ e Historia de Galicia.